בעזרת השם יתברך ובשעה טובה ומוצלחת איז פארטיג געווארן די לאנגיעריגע פראיעקט ביי רוט 208 קארנער מאונטען ראוד צוצולייגן א פעססינג ליניע צו פארגרינגערן די טראפיק פאר די טויזנטער רייזנדע וואס פארן אדורך דעם אינטערסעקשן טאג טעגליך.

דער פראיעקט איז אייגנטליך פון די ערשטע אונטערנעמונגען וואס די איצטיגע ווילעזדש אדמינסטראציע האט אונטערגענומען תיכף נאך וואס די היימישע באאמטע זענען אריינגעקומען אינעם ווילעדזש אום תש"פ, נאוועמבער 2020 למס', ווי מען האט זיך גראד גענומען ארבעטן צו זען וואס מען קען טאן צו לינדערן די פילע פראבלעמען און די וועכנטליכע און אפטמאל טעגליכע עקסידענטן וואס פלעגן כסדר פאסירן ביי די אינטערסעקשאן.

די פראיעקט האט זיך אנגעהויבן צום ערשט מיט די "טעמפארערי" טראפיק ליכט, וואס האט גענומען קרוב צו צוויי יאר צו ערלעדיגן, קודם צו אויסמיידן די סטעיט די.או.טי. וואס כאטש זיי האבן שוין עפפראווד דעם טראפיק ליכט און אפגעשטימט די פאנדן דערפאר מיט א אינסטאלירונג דאטום פון 2025, האבן זיי אבער געהאלטן -און טוען נאך אצינד- נאכאנאנד אפשטופן די אינסטאלאציע, און דער פראיעקט איז נאך אצינד פארשלעפט, לויט זייער יעצטיגער שאצונג דארף די "פערמאנענטע" טראפיק ליכט ווערן אינסטאלירט אין יאר 2028 למס׳.

ווי דער ציבור האט טאקע מיטגעהאלטן דאן, איז תיכף נאך וואס די טראפיק ליכט איז געווארן אינסטאלירט, איז די ווילעדזש געגאנגען צום קומענדיגע פאזע, צוצולייגן א פעססינג ליניע, ווי די פראצעדור האט זיך באלד אנגעשטויסן אין לעגאלע, טעכנישע און פראקטישע שטרויכלינגען, ווען עס האט אלס גענומען א וויילע פאר יעדן שטאפל צוליב די פארפלאנטערטע אלטמאדישע ביוראקראטישע פראצעדורן וואס האבן אויפגעהאלטן דעם פראיעקט, און צוגאב צו אונזערע גוטע פריינד וואס האבן אונז פראבירט כסדר ארויסצוהעלפן דערמיט.

אבער ברוך השם, נוצר תאנה יאכל פריה, והזורעים בדמעה ברינה יקצורו, ווי ברוך השם דער פראיעקט איז אצינד פארטיג געווארן בשטו״מ צו די הנאה און צו די צופרידענהייט פון די טויזענטער רייזענדע אויף רוט 208, סיי די איינוואוינער פונעם ווילעדזש אוו סאוט בלומינג גראוו און סיי פון אלע ארומיגע מוניציפאליטעטן וואס נוצן טעגליך דעם גאר וויכטיגן אינטערסעקשאן פון רוט 208 און מאונטען ראוד.

עס איז וויכטיג אונטערצושטרייכן, אז אויף די אינטערסעקשאן פארט דורך טעגליך לכה״פ 16,000 קארס לויט די טראפיק שטודיע פון פאראיאר זומער, רייזענדע פלעגן זיצן טעגליך א מינומום פון 15-20 מינוט אדורכצופארן די לייט אין די פארנומענע צופרי שטונדן און באזינדער 20 מינוט אין די נאכמיטאג שטונדן, ברוך השם לעצטע וואך, ווי נאר מען האט געעפנט דעם אויסגעברייטערטן ליניע האט מען שוין געזען א געוואלדיגע דערלייכטערונג פאר יעדן, עס שפארט אפ א געוואלד פון צייט פאר ארבעטער, דעליוועריס און ועל כולם טוט דאס עלימינירן אן אומגעהויערע צאל ביטול תורה דרבים און ביטול תורה פון תינוקת של בית רבן אויף א טעגליכע פארמאט.

דער ווילעדזש טראנספארטאציע קאמיטע גייט אצינד צו די קומענדיגע פאזע, מען ארבעטן אויף נאך א טוירנינג ליניע ביים ארויפפארן צו מאונטען ראוד קומענדיגע פון מוזעאום ווילעזדש, אויך ארבעטן די אינזשענירן אויף דעם גרויסן פראיעקט פון אויסברייטערן דעם 208 דורכאויס דעם גאנצן ווילעזדש, אז עס זאל זיין צוויי לעינס צו יעדע זייט מיט ברייטע שאולדערס.

צו די זעלבע צייט, איז מען אצינד פארנומען אין געריכט איבער די מענדזשין בייפעס, וואס דאס וועט נאך פיל מער פארלייכטערן דעם טראפיק, אז מען זאלן נישט דארפן בכלל ניצן רוט 208 ביים קומען פון קרית יואל קיין בלומינג גראוו און צוריק, און אז מען זאל קענען דורכפארן דעם גאר קורצן וועג דורך די גאנזאגא פארק, וואס דאס וועט נעמען קנאפע צוויי מינוט.

כי מלאכיו יצוה לך לשמרך בכל דרכיך!

ובשם ד׳ נעשה ונצליח!